Қордайда 100 отбасы баспаналы болды

25 қазан - Республика күні мерекесі қарсаңында Қордай ауылындағы «Батыс» ықшам ауданында жаңадан бой көтерген 5 қабатты 60 пәтерлі тұрғын үй және Цемзауыт ықшам ауданында 40 пәтерлі тұрғын үй пайдалануға берілді. Бұл күні баспана кезегін тағатсыздана күтіп келген 100 отбасы қуанышқа бөленді. Қоныс иелерін аудан әкімі Бегзат Болатбеков арнайы барып құттықтап, пәтер кілтін салтанатты түрде табыс етті. Бүгінгі таңда тұрғындарды баспанамен қамтамасыз ету мәселесіне мемлекеттік деңгейде ерекше көңіл бөлініп келеді. Қазақстандықтарды тұрғын үймен қамтамасыз ету бойынша ауқымды жұмыстар атқарылды. Мәселен, Қордай ауылында аз уақыт ішінде жаңа «Батыс» деп аталатын көпқабатты ықшам аудан бой көтергеніне көпшілік куә. Бүгінгі қоныс той соның дәлелі. Мердігер «Сырым Блеке» ЖШС салған жаңа үйде өмір сүруге барлық жағдайлар жасалған. Оны үйді аралап көрген, осында қоныстанып отырған қордайлықтар да айтуда. Ашылу салтанатында жаңа ықшам аудан ән мен жырға бөленді. Көпшілік қуанышты көңіл-күймен құттықтаулар және ізгі тілектерді естіп, алғыстарын да жеткізді. - Халықты алаңдатқан тұрғын үй мәселесі Қордай ауданында да жыл өткен сайын кезең-кезеңімен шешімін табуда, оған баршамыз куәміз. Бүгінге дейін ауданымызда 2347 азамат тұрғын үй кезегінде тұрса, бұл тізім бүгін 100 отбасыға қысқармақ. Бұл бағыттағы жұмыс жалғасын тауып, жыл соңына дейін тағы 3 тұрғын үйден 150 отбасыға баспана кілті берілетін болады. Айта кету керек, ауданның жомарт жандары да халықтың әлеуетінің артуына барынша үлес қосуда. Жыл басынан «Асарлатып үй салу» жобасы аясында аудандағы кәсіпкерлердің демеушілігімен 14 отбасы баспаналы болса, жыл соңына дейін тағы 6 отбасыға үй беріледі деп жоспарлануда. Бүгінгі жаңа пәтер кілтін алған отбасыларға қоныстарыңыз құтты болсын дегім келеді. Осы шаңырақ сіздерге бақ-береке, ырыс әкелсін, - деген аудан әкімі алғашқы пәтер кілтін иесіне табыстады. Жаңа пәтерге ие болғандардың дені әлеуметтік осал санаттағы отбасылар, осыған дейін кезекте тұрған жандар. Игі шара мемлекеттің тұрғындарға деген қамқорлығының бір дәлелі. Әсілі, осындай қолдау еселене берсін деген тілегіміз бар.