Аудандардың әлеуетін ескеріп, инвестиция тартуға күш салу қажет,- Е.Қарашөкеев

Барлық ауданның әлеуетін тиімді пайдаланып, инвестиция тарту бойынша жұмыстарды ұтымды ұйымдастыру маңызды. Жамбыл облысының әкімі Ербол Қарашөкеев кеңейтілген мәжілісте осылай деп, аудан әкімдері салалық басқарма басшыларына нақты міндеттер жүктеді. Жиында 2021-2025 жылдарға арналған кәсіпкерлік көрсеткіштердің орындалу мәселелері қаралды. Кәсіпкерлік және индустриалды-инновациялық дамыту басқармасының басшысы Аспандияр Сейсебаевтің айтуынша, ағымдағы жылдың қаңтар-қараша айларының қорытындысымен өңдеу өнеркәсібі  саласында өнім көлемі 545,9 млрд. теңгені құраған. Есепті кезеңде өңдеу өнеркәсібінің химия өнеркәсібі (105,0%), өзге де металл емес минералдық өнімдер өндірісі (103,8%), машина жасау (134,5%), жеңіл өнеркәсіп (106,7%) салаларында өнім көлемі артқан. Аймақ басшысы басқармалар мен аудан әкімдері өңірімізде инвестициялық ахуалдың сақталуына мүдделік таныту қажеттігін атап өтті.

Басқосуда жұмыспен қамтуды үйлестіру және әлеуметтік бағдарламалар басқармасының басшысы Еркін Келесов кәсіпкерлікті дамыту жөніндегі ұлттық жоба аясында қол жеткізілген көрсеткіштері туралы есебі тыңдалды. Оның айтуынша, қазіргі таңда «Бастау Бизнес» жобасы шеңберінде 6715 адам оқуларын аяқтап, олардың 3032-сі жеке кәсібін ашқан. Сондай-ақ, жыл басынан бері 3 айлық  қысқа мерзімдік оқытуға 1405 адам жолдама алып, бүгінде оның 152 азамат тұрақты жұмысқа орналасқан. Жиын қорытындысында облыс әкімі арнайы бағдарламаға қатысып, жеке кәсіпкер ретінде тіркелген азаматтардың жұмысына мониторинг жүргізу, мемлекет қаржысын мақсатты пайдалану жөнінде баса айтып, жауаптыларға кәсіпкерлік көрсеткіштерін жақсарту бойынша нақты шаралар қабылдауды тапсырды.