John Deere және Eurasia Group «Бәйтерек» холдингінің қолдауымен Қазақстанда құрастыру арқылы жергілікті қатысуды кеңейтеді
МОЛИН, Иллинойс - Қазақстанның ауыл шаруашылығы және өнеркәсіп секторларын нығайтуға бағытталған маңызды қадам Deere & Company, Eurasia Group және «Бәйтерек» холдингі арасындағы өзара түсіністік туралы меморандумға қол қою арқылы жасалды. Келісімнің мақсаты – Қазақстанда технологияларды дамытуға, білім алмасуға және тұрақты дамуға жәрдемдесу. Бұл стратегиялық серіктестік инновацияларды енгізу, жергілікті өндірістік қуаттарды арттыру және елдің ұзақ мерзімді экономикалық өсуін қолдауға деген ұмтылысты көрсетеді.
Меморандум талаптарына сәйкес, серіктестік жаңа технологияларды енгізуге, цифрлық трансформация мен өнеркәсіптік дамуға баса назар аударады, бұл ауыл шаруашылығы және өнеркәсіп секторларының тиімділігін арттыруды мақсат етеді.
«Алдыңғы қатарлы технологияларды пайдаланып, білім алмасуды қолдау арқылы біз экономикаға да, жергілікті халыққа да пайда әкелетін тұрақты өсудің негізін қалыптастырамыз», – деп мәлімдеді John Deere-дің ТМД және Орталық Азия бойынша «Ауыл шаруашылығы және көгалдар» бағытындағы президенті Чаба Лейко.
«Қазақстанға тікелей инвестициялар салуға деген әлемдік салалық көшбасшылардың қызығушылығын құптаймыз, өйткені бұл біздің ел мен өңірдің агроөнеркәсіптік әлеуетін іске асыру арқылы тұрақты экономикалық өсуді қамтамасыз етеді», – деп атап өтті «Бәйтерек» холдингі басқарма төрағасының орынбасары Жандос Шайхы.
Бұл келісім жаңа жұмыс орындарын ашуға, экономикалық тәуелсіздікті арттыруға және Қазақстанның ауыл шаруашылығы саласының тұрақты өсуіне ықпал етеді деп күтілуде. Ол Deere & Company, Eurasia Group және «Бәйтерек» холдингінің Қазақстанның бәсекеге қабілеттілігін арттыруға және оны Орталық Азиядағы ауыл шаруашылығы мен өнеркәсіптік дамудағы көшбасшы ретінде қалыптастыруға бағытталған ортақ мақсатын көрсетеді.
John Deere компаниясы туралы
Deere & Company (www.JohnDeere.com) – ауыл шаруашылығы, құрылыс және орман шаруашылығы жабдықтарын өндіру бойынша әлемдік көшбасшы. Компания клиенттеріне өнімділікті арттыру және тұрақтылықты қамтамасыз ету арқылы мүмкіндіктер шегін кеңейтуге көмектеседі. John Deere автономды 8R тракторы, See & Spray™ және E-Power экскаваторы сияқты технологиялық жетілдірілген өнімдер азық-түлікке, тұрғын үйге және инфрақұрылымға деген әлемдік сұранысты қанағаттандыруға жәрдемдеседі. Компания сонымен қатар John Deere Financial арқылы қаржылық қызметтер көрсетеді.
«Бәйтерек» холдингі туралы
ҚР Үкіметі құрған «Бәйтерек» ұлттық басқарушы холдингі (https://baiterek.gov.kz/en/) – елдің негізгі даму қаржы институты. Оның басты мақсаты – Қазақстан экономикасын басым салаларды қолдау арқылы сапалы дамытуға жәрдемдесу. Холдинг құрылымына еншілес 7 ұйым кіреді, олардың 50%-дан астам акциялары холдингке тиесілі. Оның еншілес компанияларының қызметі агроөнеркәсіптік кешенді дамытуға, бизнесті қолдауға және халық үшін қолжетімді тұрғын үйді қамтамасыз етуге бағытталған.
Eurasia Group компаниясы туралы
Eurasia Group Қазақстандағы John Deere ауыл шаруашылығы техникасының ұлттық дилері болып табылады және ол бұл нарықта 20 жылдан астам уақыт жұмыс істейді. Қазақстандық фермерлерді қолдау мақсатында компания ел бойынша 14 өкілдік ашты, 80 миллион АҚШ долларынан астам инвестиция салып, 600-ден астам жұмыс орнын құрды. Eurasia Group John Deere техникасын пайдаланып жүрген 2500-ден астам отандық фермерлерді қолдайды. Олар John Deere техникасымен 3,5 миллион гектардан астам алқапта егін егетін және 6,5 миллион гектардан астам жерден өнім жинайды.