«Таза Қазақстан» экологиялық акциясы аясында атқарылған жұмыстар
Жамбыл облысы бойынша 371 елді мекенде қоршаған ортаға эмиссиялары бар 163 тұрмыстық қатты қалдықтар полигоны орналасқан, оның 159-ы коммуналдық меншікте, 4-уі жеке кәсіпкерлерге сенімгерлік басқаруға берілген.
Бүгінгі күнге полигондарда жалпы 3,2 млн. тоннадан аса тұрмыстық қалдықтар жиналған, оның ішінде 2024 жылы жинақталған қоқыс көлемі - 58,7 мың тонна, бөлек сұрыпталған қалдықтардың үлесі 20% немесе 11,7 мың тонна құрайды.
Жалпы, облыста тұрмыстық қатты қалдықтарды шығару қызметі бәсекелестік ортаға берілген.
Бұл қызметпен 40 мекеме айналысады, жалпы 191 бірлік техника жұмылдырылған.
Барлығы 792 күл-қоқыс алаңшаларында 4 102 дана контейнерлер орналасқан, оның ішінде:
- 700 дана полиэтилен, пластик қалдықтарын жинауға арналған торлы контейнерлер;
- 106 дана құрамында сынап бар шамдарға арналған жабық контейнерлер;
- 3296 дана тұрмыстық қатты қалдықтарды жинауға арналған контейнерлер.
Күл-қоқыс алаңшаларынан күнделікті шығарылатын тұрмыстық қатты қалдықтардың орташа көлемі 1200 - 1300 м3 құрайды. Бекітілген кестеге сәйкес, тұрмыстық қатты қалдықтарды шығару қызметі көпқабатты тұрғын үйлерде күнделікті, жеке секторларда белгіленген күндері аптасына 2 рет көрсетілуде.
Жамбыл облысы экология департаменті тарапынан кездейсоқ тұрмыстық қатты қалдықтардың орнын анықтау мақсатында «Қазақстан Ғарыш Сапары» Ұлттық компаниясы» АҚ-ның бағдарламасы арқылы ғарыштық мониторинг түсірілімі жүргізіліп келеді.
Өткен жылғы мониторинг нәтижелері кезінде 343 кездейсоқ қоқыс учаскілері анықталып (көктемде - 91, күзде - 252), белгіленген мерзімдерінде толық жойылды.
Осыған орай, Жамбыл облысының мамандандырылған табиғат қорғау прокуратурасының ұсынымы негізінде анықталған кездейсоқ тұрмыстық қатты қалдықтар бойынша жауапты лауазымды тұлғаларға «Әкімшілік құқық бұзушылық туралы» ҚР кодексінің 324-бабының 1-тармағына сәйкес әкімшілік хаттама толтырылып, жалпы соммасы 414,380 мың тенгеге айыппұл салынды (Байзақ, Жамбыл, Қордай аудандары әкімдерінің орынбасарлары, Тараз қаласы ТКШ бөлімінің басшысы, Көлбастау, Ақсай, Нұрлыкент, Көкбастау, Б.Момышұлы, Талас, Масаншы, Сарытобе ауылдық округтердің әкімдері).
Биылғы ғарыштық мониторинг түсірілімі мамыр-маусым айларында жүргізіледі.