Тараз қаласының 2025-2026 жылдарға арналған әлеуметтік-экономикалық даму жоспары
Мемлекет басшысының бастамалары мен облыс әкімі Ербол Шырақбайұлының тапсырмасына сәйкес, Тараз қаласының әлеуметтік-экономикалық дамуын жүйелі түрде қамтамасыз ету – басты міндеттердің бірі. Осы мақсатта қаламызда ауқымды жобалар жүзеге асырылып, нақты істер қолға алынуда.
Биыл негізгі жаңалықтарымыздың бірі, өздеріңіз білетіндей қалада екі аудан яғни «Әулиеата» және «Жібек жолы» аудандары құрылды. Жер көлемі 13 мың гектарға ұлғайып, 31,8 мың гектарды құрады. (бұрынғы жер көлемі - 18,8 мың гектар) Халық саны 437 мыңнан 482 мыңға жетті.
Аудандардың құрылуы қаланың аумақтық тұтастығын, бүкіл қаланы бақылауды, мемлекеттік қызметтерді, аумақтық жұмыстарды ұйымдастыру және төтенше жағдайлар кезінде құрылымдық күштерді жедел ұйымдастыруды қамтамасыз етеді.
Тараз қаласының 2023-2025 жылдарға арналған даму картасына сәйкес қалада өзекті болып отырған біраз мәселе өз шешімін табуда.
Әсіресе көлік қозғалысын тиімді ұйымдастыру, көлік жолдарындағы жүктемені азайту бойынша облыс орталығында қажеттілік туындағаны рас. Осы мақсатта екі көпір құрылысын салу жоспарланды.
Біріншісі Абай даңғылының темір жол үсті арқылы өтетін жол өткелі мен жаяу жүргіншілер өткелі бөлігінің құрылысын салу мақсатында мемлекеттік сараптама қорытындысы алынып, республикалық бюджетке 16,9 млрд. теңгеге өтінім ұсынылды. Қазіргі таңда көпір құрылысын жүргізу үшін жол бойындағы жеке тұрғын үйлермен коммерциялық нысандарды мемлекет меншігіне қайтару үшін 1,8 млрд. теңге және нысандарды сүру жұмыстарына 285,04 млн. теңге қаржы қарастырылып, жұмыстар басталды.
Мемлекет мұқтажы үшін қайтаруға қажетті жер учаскелерінің көлемдері нақтыланып, барлығы 61 нысан (оның ішінде 42 жеке тұрғын үй, 16 кәсіпкерлік нысан және 2 мемлекеттік жер пайдаланушы және 1 газ тарату торабы) мемлекет қажеттілігі үшін иеліктен шығаруға жататыны анықталды.
Меншік иелеріне ұсыныстар жолданып 42 меншік иесі келісім берді, мәслихат отырысында келісілді. Келіспеген 11 меншік иесінің құжаттары соттың қарауына жолданды. 3 жер теліміне қатысты мемлекетке қайтару туралы қаулыға өзгерістер енгізіліп, қайта бағалауға жолданды.
Сонымен қатар, 2 жер учаскелерінің иелері мүліктерін мұрагерлікке қабылданғаннан кейін, тиісті жұмыстар жүргізіледі.