«АУЫЛ АМАНАТЫ» БАҒДАРЛАМАСЫ АЯСЫНДА 3,7 МЛРД ТЕҢГЕГЕ 518 ЖОБА ҚАРЖЫЛАНДЫРЫЛДЫ
Өңірде ауыл тұрғындарының әл-ауқатын арттыруға және агроөнеркәсіптік кешенді дамытуға бағытталған мемлекеттік бағдарламалар жүйелі түрде жүзеге асырылуда. Соның ішінде «Ауыл аманаты» бағдарламасы аясында 518 жоба қаржыландырылып, жалпы сомасы 3,7 млрд теңгені құрады. Бұл бастама ауылдағы кәсіпкерлікті дамытуға, жаңа жұмыс орындарын ашуға және халықтың табысын арттыруға оң әсерін тигізуде.
Бағдарлама шеңберінде қаржыландырылған жобалар ауыл шаруашылығының түрлі бағыттарын қамтиды. Атап айтқанда, мал шаруашылығы, өсімдік шаруашылығы, сондай-ақ ауыл шаруашылығы өнімдерін өңдеу салаларына басымдық берілген. Нәтижесінде, өңірде өндіріс көлемі артып, ішкі нарықты отандық өніммен қамтамасыз ету мүмкіндігі кеңеюде.
Жалпы, өңір экономикасында оң динамика байқалады. Мәселен, 2025 жылдың қорытындысы бойынша қоғам 134 млн теңге көлемінде пайда тапса, активтер көлемі 31,3 млрд теңгеге жетті. Бұл көрсеткіштер өңірдегі қаржылық тұрақтылық пен тиімді басқарудың нәтижесін көрсетеді.
Сонымен қатар, әлеуметтік маңызы бар азық-түлік тауарларының бағасын тұрақтандыру мақсатында өңірлік тұрақтандыру қорының жұмысы күшейтілді. 2025 жылдың соңында қордағы азық-түлік қорының жалпы көлемі 4,4 млрд теңгені құрады. Қор арқылы жыл бойы сауда желілеріне 240,3 млн теңгеге өнім жеткізіліп, тұрғындарға қолжетімді бағамен ұсынылды. Бұдан бөлек, жәрмеңкелерде де тұрақты түрде азық-түлік өнімдері төмендетілген бағамен сатылып келеді.
Азық-түлік қауіпсіздігін қамтамасыз ету және бағаны тұрақтандыру бағытында әлеуметтік павильондар желісі де кеңейтілуде. 2026 жылдың басынан бері екі жаңа павильон ашылып, олардың жалпы саны 15-ке жетті. Бұл тұрғындарға қажетті өнімдерді тиімді бағамен алуға мүмкіндік береді.
Агроөнеркәсіптік кешенді дамытуда инвестициялық жобалардың да маңызы зор. 2025 жылы «СҚО тәжірибесін тираждау» бағдарламасы аясында 9,3 млрд теңгеге 11 жоба қаржыландырылды. Олардың қатарында көкөніс қоймаларын салу, өнім өңдеу кәсіпорындарын іске қосу, сондай-ақ мал және құс шаруашылығын дамыту жобалары бар. Атап айтқанда, жылына 10 млн жұмыртқа өндіретін құс шаруашылығы кешені мен 10 мың басқа арналған қой фермасы өңірдің аграрлық әлеуетін арттыруға бағытталған ірі жобалар саналады.
Алдағы уақытта да ауыл шаруашылығын қолдау жалғасады. 2026 жылға аталған бағдарлама аясында 6,5 млрд теңге бөлу жоспарланып отыр. Бұл қаражат жаңа жобаларды іске асыруға және ауылдағы кәсіпкерлікті одан әрі дамытуға мүмкіндік береді.
Жалпы, «Ауыл аманаты» бағдарламасы мен басқа да мемлекеттік бастамалар ауылдық аумақтардың тұрақты дамуына, халықтың өмір сүру сапасын арттыруға және өңір экономикасының нығаюына берік негіз қалыптастыруда.