БАҚ  өкілдеріне арналған кезекті  пресс-тур өтті. Бұл жолы журналистер Жамбыл облыстық мәдениет, архивтер және құжаттама басқармасына қарасты  облыстық дәрежедегі кітапханалардың тыныс-тіршілігімен танысты. Алдымен тілшілер Жамбыл облыстық көзі көрмейтін және әлсіз көретін азаматтар кітапханасына барды. Бұл кітапхана Тараз қаласы  мен аудандардағы орталық кітапхананың зағип оқырмандарына қызмет көрсетеді. Кітапханада ерекше оқырмандар үшін жағдайдың бәрі жасалған. Тіпті, кабинеттерде қойылған гүлдерге дейін QR код жабыстырылған. Яғни, келушілер сол код арқылы барлық ақпаратты ести алады. Бүгінде кітапханаға тіркелген оқырман саны 1 990. Кітап қоры 40 581. Соның ішінде 19 623 кітап қазақ тілінде.  Биыл басқарманың қолдауымен жаңа кітаптар сатып алуға 5 млн. қаражат бөлінген. Аталған ақшаға 626 жаңа кітап сатып алыныпты. Сондай-ақ, биыл кітапханада Шерхан Мұртазаның «Ауылды, сені сағынам...» атты жарияланбаған хаттары бойынша әзірленген брайль кітаптарының тұсаукесері өткен. Кітаптар зағиптар мектебі мен Ш.Мұртаза атындағы «Руханият және тарихтану» орталығына табысталыпты. Мекеме қызметкерлері бүгінде 13 жоба бойынша жұмыс істейді. Кітапхана жан-жақты қызмет көрсету бойынша зағип азаматтарға, отбасы мүшелеріне және басқа санаттағы мүмкіндігі шектеулі жандарға ұлттық рухани құндылықтар мен әлем мәдениетін тарату, білім беру, мәдени-рухани сауықтыра отырып, бос уақытын тиімді өткізу орталығы ретінде мейірім мен жылу шаңырағына айналған. Пресс-тур әрі қарай Д.А.Қонаев атындағы Жамбыл облыстық балалар мен жасөспірімдер кітапханасында жалғасты. Аталған кітапхананың қорында 108311 кітап бар. Оқырман саны жылына 10 800-ден аса, келушілер саны 87 мың адам. Кітап берілімі жылына 175 мың дана. Кітапханада «Әлемді кітап арқылы танимын», «Тарихыңды таны – тұлғаңды құрметте!», «Дара бол!», «Мен оқимын,сен оқисың, бәріміз де оқимыз», «Үлкенге 100 сұрақ» т.б. жобалары мен байқаулары дәстүрлі түрде жүзеге асады. Сонымен қатар балалар мен жасөспрімдердің  қызығушылықтарына қарай көптеген үйірмелер мен клубтар жұмыс істейді. Сондай-ақ мұнда ата-аналар үшін қалай үй алуға болады деген сынды кеңестерде беріледі екен. Ал балалар үшін логопед кабинеті қызмет көрсетеді. Тіпті кейбір оқырман балаларды ата-аналары таңертең әкеліп тастап кешке алып кетеді. Яғни, балалар сол жерде кітап оқиды, ойнайды, мультфильм көреді. Ал кішкентай әріп танымайтын  оқырмандар үшін, 4D форматтағы «Динозаврлар әлемі», «Астрономия» сынды кітаптар бар. Оны телефонмен QR код арқылы арнайы сайтқа өтіп  көруге болады. Биыл кітапханаға 65 жыл толып отыр. Осы мақсатта 12 қазан күні  еркін форматта жергілікті балалар жазушыларын шақырып жиын өткізу жоспарланған. 5 қабатты үйдің 1 қабатында орналасқан ғимаратта отыру қазіргі таңда тарлық етеді,- дейді кітапхана директоры Гүлфайруз Іңкәрбекова. Яғни, жылдан жылға кітап қоры көбейгендіктен үлкен, жаңа ғимаратқа көшсек деген ниетін білдірді – мекеме директоры.