25 қазан – Республика күніне орай Ақтөбе ауылдық округінде екі нысан пайдалануға берілді. Бірі - Бәйтерек ауылында жүргізілген ауыз су жүйесі, екіншісі - Жаңаталап ауылындағы «BAKESH ARENA» еркін күрес залы ел игілігіне берілді. Жуалы ауданы әкімінің м.у.а. Асхат Жабағы, аудандық ардагерлер кеңесінің төрағасы Сейтхан Жұмашев жаңа нысандардың ашылуына қатысып, ауылдықтарды қуаныштарымен құттықтады. Айта кетейік, Ақтөбе ауылдық округі Жаңаталап ауылындағы «BAKESH ARENA» еркін күрес залының құрылыс жұмыстарына 22 млн  қаражат демеушілер тарапынан жүргізіліп, жұмыстарды сапалы аяқтаған. Құрылыс нысаны 2023 жылдың 25 қаңтарында басталып, 2023 жылдың 25 қазанында пайдалануға беріліп отыр. Барлық қажеттілікпен қамтылған спорт нысанының көлемі 10 м х 34 м. Жалпы, аудан тұрғындарына 1 стадион, 1 спорт кешені, 45 спорт зал, 12 үлкен футбол алаңы және 95  кіші футбол, баскетбол, волейбол, стритворкаут, әмбебап алаңшалар қызмет көрсетеді. Жуалы ауданы Бәйтерек ауылын ауыз сумен қамтамасыз ету мақсатында су құбырының құрылысын жүргізу бойынша ауыз су құбырының ұзындығы – 14,35 шақырым. Ауыз су жүйесімен 324 аула 1326 тұрғынды ауыз сумен қамту жоспарлануда. Жаңа нысандардың ашылуы салтанатында лента қию рәсімі орындалып, ауыл ақсақалдары бата берді. Ауыл азаматтарының демеушілігімен ақсақалдарға сый-сияпаттар көрсетілді. Мерекелік шараның соңы ауыл өнерпаздарының ән шашуымен жалғасын тапты.