Бұл бұзушылықтар құқық иелерінің рұқсатынсыз тауар белгілерін пайдалана отырып, тауарларды электрондық сауда орындарында орналастырумен байланысты. ОКҚ-да Әділет вице-министрі Ботагөз Жақселекова айтып өткендей, іс жүзінде жекелеген қазақстандық маркетплейстер заңсыз орналастырылған өнімді алып тастаудан бас тарта отырып, құқық иеленуші өкілдердің тауар таңбасын заңсыз пайдаланады деген шағымдар түседі.
Сонымен қатар өтініш берушілердің ақпаратына сәйкес, жеке маркетплейстердің әкімшілері сатушылар туралы мәліметтерді жасырып, олардың атына тиісті шағымдарды жіберуге кедергі келтіреді.
«Тауар таңбалары туралы Заңға сәйкес, тауар таңбасының иесі өзіне тиесілі тауар таңбасын пайдалануға және оған билік етуге айрықша құқығы бар. Заң Қазақстан Республикасында қорғалатын тауар белгісін иесінің келісімінсіз ешкім пайдалана алмайтынын тікелей белгілейді. Зияткерлік меншік құқығын сақтамау маркетплейстерге ауыр зардап әкелуі мүмкін. Сондықтан зияткерлік меншік құқықтарының бұзылуы мен құқық иеленушілердің талап-арыз беруін болдырмау мақсатында біз барлық маркетплейске зияткерлік меншік құқықтарын сақтау жөніндегі саясатты күшейтуді ұсынамыз», - деп атап өтті спикер.
Мысалы, маркетплейстерде зияткерлік меншік құқығын жүйелі түрде бұзатын сатушыларға санкциялар берілуі мүмкін - бұл шоттарды бұғаттау, айыппұлдар немесе заң негізіндегі салдар болуы мүмкін.
Ведомство өкілі мүдделі тұлғаларды шетелдік сарапшылардың қатысуымен маркетплейстерге арналған оқыту семинарына қатысуға шақырды. Іс-шара 3 - қыркүйекте ЕО-мен бірлесіп өткізіледі.
Келесі мақала
ЖАМБЫЛДА 6 МЛН ҚОРАП ТЕМЕКІ ТӘРКІЛЕНДІ
Ұқсас жаңалықтар
