Республика күніне орай, аймақта халықтың игілігі үшін жаңа нысандар ашылуда.Соның бірі Жамбыл ауданы, Қызыл-Дихан ауылында ашылған  кіші футбол алаңы. Гродиково ауылдық округінің әкімі Болат Қожабеков жастар алаңды көптен бері күткенін, аудандық бюджеттен 10 млн қаржы қаралып, мердігер жұмыстарды сапалы жүргізген айтады. Мұнда 800-ге жуық тұрғын тұрады. Тұрғындардың қуанышын бөлісуге аудан әкімінің орынбасары Мақпал Досымбекова келіп, көпшілікті республика күнімен және жаңа нысанның ашылуымен құттықтады. –  Ауданымызда дене шынықтыру және спортпен жүйелі түрде шұғылданушылардың саны 35 мыңға жетті. Өңірде бұқаралық спортты дамытуға үлкен мән беріліп, 177 спорт нысаны жергілікті тұрғындарға қызмет көрсетуде. Ағымдағы жылы Сұлутөр ауылында спорт кешені пайдалануға берілсе, жыл соңына дейін тағы 4 елді мекенде спорт кешендерін пайдалануға беру жоспарлауда. Сонымен қатар, келесі 2024 жылы Бесағаш ауылында спорт кешенінің құрылысы аяқталатын болады, – деді Мақпал Сатыбалдықызы. Осылайша, республика күніне орай  аудандағы 4-ші футбол алаңы ел иігілігіне пайдалануға беріліп отыр.