Бүгін Тараз қаласындағы «Динамо» спорт кешенінде ҚАЖ департаментінде қызмет еткен ардагеріміз Серік Нұханұлы Ахметовты еске алуға арналған шағын футболдан турнир өтті. Жамбыл облысы бойынша ҚАЖ департаменті бастығы әділет подполковнигі Жәнібек Жамалбекұлының бастауымен өткен турнирге ҚАЖ департаментіне қарасты мекемелер қызметкерлерінен құралған 7 құрама команда қатысты. Жыл сайын ұйымдастырылатын турнирде  әріптестеріміз бір уақыт жасыл алаңда теңбіл доп теуіп, серігіп қалды. Ахметов Серік Нұханұлы 1959 жылдың 6 сәуірінде Алматы қаласында дүниеге келген. Ішкі істер органдарында 1983 жылы қазаннан бастап 2008 жылы қараша айына дейін 25 жыл қызмет етті. Өзінің жоғары кәсіби біліктілігінің арқасында ҚР Әділет министрілігінің Қылмыстық-атқару жүйесі Жамбыл облысы бойынша басқармасының бастығы лауазымына дейін көтерілді. Жамбыл ауданы, Шөлдала ауылында кіші басшы құрамның алғашқы дайындықтан өтуіне арналған Оқу орталығын, Тараз қаласының А.Асқаров көшесінде еуропалық стандартқа сай жаңа ЖД-158/7 түзеу мекемесін ашты.