2025 жылдың 12 айының қорытындысы бойынша Жамбыл облысында 536 есірткі құқық бұзушылығы анықталды. Бұл өткен жылмен салыстырғанда 58 дерекке артық. Оның ішінде 235 қылмыс және 301 қылмыстық теріс қылық тіркелген. Қабылданған кешенді шаралардың нәтижесінде заңсыз айналымнан 9 тонна 242 келі түрлі есірткі заттары тәркіленді. Бұл көрсеткіш өткен жылмен салыстырғанда 3 тонна 250 келіге көп.

Тәркіленген есірткі заттарының құрылымы:

кептірілген марихуана – 4 т 530 кг;

қарасора өсімдігі – 4 т 546 кг;

гашиш – 162 кг;

синтетикалық есірткі – 9 кг 288 г.

«Шу алқабынан» тасымалға тосқауыл

Есірткі заттарының республика өңірлеріне таралуына жол бермеу мақсатында Қарағанды, Алматы және Түркістан облыстары бағыттарында полицияның мобильдік топтары қойылды. Жыл басынан бері аталған топтардың жұмысы нәтижесінде 20 тасымалдау арнасы тоқтатылып, 295 кг-нан астам марихуана, 151 кг гашиш, 470 г синтетикалық есірткі тәркіленді. 22 адам ұсталды. Сонымен қатар, үш ішкі бақыланатын жеткізу ұйымдастырылды.

Ұйымдасқан қылмыстық топтарға соққы.

Заңсыз есірткі саудасымен айналысқан 6 адамнан тұратын ұйымдасқан қылмыстық топ әшкереленіп, жолы кесілді. ҚР Қылмыстық кодексінің 262-бабының 1 және 2-бөліктері бойынша екі қылмыстық іс қозғалып, сотқа жолданды. Синтетикалық есірткілермен күрес те күшейтілді. 2025 жылы бұл бағытта 14 адам ұсталып, заңсыз айналымнан 9 кг-нан астам синтетикалық есірткі тәркіленді. Атап айтқанда, 26 маусымда Шу қаласынан Алматы облысына бағытталған жедел іс-шара барысында синтетикалық есірткі өндіретін нарколаборатория ұйымдастырған Ресей Федерациясының екі азаматы ұсталды. Тінту кезінде 8 кг-нан астам «мефедрон», 2 тоннадан аса прекурсорлар мен арнайы жабдықтар алынды.