Осы аптада облыс әкімі Ербол Қарашөкеев ардагер ұстаздар, Тараз қаласы мен облыстың аудандарындағы бірқатар мектеп басшыларымен кездесті. Кездесуге қатысқан өңірімізге белгілі ардагер ұстаз, білім беру ісінің құрметті қызметкерлері Айша Ниязбекова мен Александр Гибнер, Тараз қаласындағы Төле би атындағы №8 гимназиясының директоры Әлішер Әзімбай, Ә.Бөкейханов атындағы №1 гимназиясының директоры Жәмила Төребекова, Меркі ауданындағы И.Трубицын атындағы №17 мектеп-гимназиясының директоры Асипа Қалқабаева, Байзақ ауданы, Ғ.Мұратбаев атындағы гимназиясының директоры Арыстанбек Қайпұлдаевпен бірге білім саласындағы өзекті сұрақтарды саралады. Басқосу барысында білім сапасын арттыру, мектеп, гимназиялардың материалдық-техникалық базасын жақсарту, цифрландыру және мемлекеттік көрсетілетін қызмет түрлерін автоматтандыру қажеттілігі, балалар тамағының сапасын жақсарту, кадр саясаты мәселелері талқыланды. Бұл мәселелердің барлығы аймақ басшысының тұрақты бақылауында болады. Сондай-ақ, Мемлекет басшысының тапсырмасына сәйкес, жаңа оқу жылынан бастап, барлық бастауыш сынып оқушылары бір мезгіл ыстық тамақпен қамтылуда.Сондай-ақ, кездесуде Ербол Шырақпайұлы тамақтың сапасын жеке бақылауда ұстайтынын баса айтты. Балалар – ел болашағы. Оларға қамқорлық танытып, сапалы білім алуына барлық жағдай жасау – біздің міндетіміз,- деп кездесуді қорытындылады.