Бұған дейін қарлы боран салдарынан 11 пойыз тұрып қалған Жамбыл облысындағы Шу-Отар теміржол аралығындағы қозғалыс қайта жанданды. Бұл туралы "Қазақстан темір жолы" ҰК хабарлады. "Теміржолшылар арнайы техниканың көмегімен тәулік бойы белсенді түрде қарды шығарып жатыр. 13 желтоқсаннан бері жолдан 11 мың текше метрден астам қарды тазалады", – деп хабарлады ұлттық компанияның баспасөз қызметі. Ауа райының қолайсыздығына байланысты төтенше жағдай жарияланған аймақта пойыздардың жүру жылдамдығына шектеу қойылды. Жолаушылар пойыздарының кешігуі және тоқтатылуы туралы ақпаратты 1433 тегін нөміріне қоңырау шалу және KTZH_PP_BOT Telegram боты арқылы алуға болады.