Жамбыл облысы ТЖД құтқарушылары мен өрт сөндірушілері бүгін үшінші тәулік облыс жолдарында жолда қалған азаматтарды құтқару жұмыстарын жалғастыруда. ТЖ департаментінің, полиция қызметкерлерінің, әскери және жол қызметтерінің күшімен Қордай (2413 адам) және Жуалы аудандарында(1683 адам) барлығы 4096 адам құтқарылды, оның ішінде 181-і балалар, 39-ы шетелдік азаматтар. Құтқарылған адамдар жылыту пункттеріне жеткізілді. Облыс бойынша штаттық режимде жұмыс істейтін 65 жылыту пункттері бар.

Айта кеткен жөн, 399 адам Түлкібас станциясы мен Шымкент станциясына дейін теміржол көлігімен жөнелтілді. Сондай-ақ, 35 бірлік техника қар құрсауынан сүйреп шығарылды.

Шу-Отар учаскесінде электр энергиясының сөндірілуіне байланысты барлығы 25 пойыз тоқтатылды. Оның ішінде 13 жолаушы пойызы бар. 15 желтоқсанда таңғы сағат 08:00-дегі жағдай бойынша жолаушылар пойыздарының кешігу жағдайы тіркелмеген.

Жамбыл облысының Республикалық маңызы бар автокөлік жолдарында 6 учаске бойынша қозғалыс шектелген.

Сонымен қатар, құтқарылғандардың тізімі келіп түскен бетте жаңартылуымен Жамбыл облысы ТЖД Instagram парақшасының Stories бөліміндегі ресми әлеуметтік желісінде, сондай-ақ Жамбыл облысы ТЖ департаментінің Telegram-каналында жариялануда.

Құрметті азаматтар! Қауіпсіздік шараларын сақтаңыздар. Ең басты ереже –ауа-райыың қолайсыз кезеңдерінде, әсіресе ақ түтек, нашар көріну және көктайғақ кезеңдерінде сапардан бас тартқандарыңыз жөн. Өрт немесе төтенше жағдай туындағанда желе түрде "101" және "112"нөмірлеріне қоңырау шалыңыздар.