Жыл басынан бері Жамбыл облысының полициясына 1,5 мыңнан астам кәмелетке толмаған жасөспірім жеткізілді. Кәмелетке толмағандар арасындағы қадағалаусыз және құқықбұзушылықтың алдын алу мақсатында полиция қызметкерлері күн сайын профилактикалық және рейдтік іс-шаралар өткізуде. Ағымдағы жылдың басынан бері полиция қызметкерлері білім басқармаларының қызметкерлерімен, комиссия мүшелерімен, жастар орталығымен және прокуратураның мобильді топтарының қызметкерлерімен бірлесіп «Түнгі қаладағы балалар» жедел-профилактикалық іс-шарасын жүргізді. Тәртіп сақшылары жастардың шоғырланған жерлерін, ойын-сауық орындарын тексереді, сонымен қатар ішкі істер органдарында есепте тұрған жасөспірімдердің үйлеріне барады. Қазіргі таңда 342 жасөспірім және 316 қолайсыз отбасы ішкі істер бөлімдерінде есепте тұр, 15 заңды өкіл ата-ана құқығынан айырылған немесе шектелген. Ішкі істер органдарына әртүрлі қылмыстық және әкімшілік құқық бұзушылық жасағаны үшін 1550 кәмелетке толмаған жасөспірім жеткізілді. Балаларды тәрбиелеу бойынша міндеттерін тиісінше орындамағаны үшін 143 ата-ана, тағы 1237-ге жуық ата-ана кәмелетке толмағандардың түнгі уақытта заңды өкілдерінсіз ойын-сауық мекемелерінде немесе үйден тыс жерде болғаны үшін әкімшілік жауапкершілікке тартылды. Кәмелетке толмағандар істері жөніндегі инспекторлар жасөспірімдер мен ата-аналарға құқық бұзушылық пен қылмыстың алдын алу тақырыбында түсіндірме жұмыстарын жүйелі түрде жүргізуде. Полиция кәмелетке толмағандардың түнде болуына тыйым салынған ойын-сауық орындарын да тексереді. Аталған заңды бұзғаны үшін мекеменің 73 әкімшісіне әкімшілік хаттамалар толтырылды. Оларға 849 мың 160 теңге айыппұл салынды. Жүргізіліп жатқан жұмыстарға қарамастан, 2024 жылдың ақпан айындағы жағдай бойынша облыста кәмелетке толмағандардың қатысуымен 9 қылмыс жасалған. Жасалған қылмыстардың жалпы санының 55,5%-ын бөтеннің мүлкін ұрлау және мал ұрлығы құрайды. Құрметті ата-аналар! Құқық бұзушылықтың және кәмелетке толмағандардың қылмыстық топтарға тартылуының алдын алу мақсатында балаларыңыздың уақытын өткізуіне бақылауды күшейтіп, олармен қауіпсіз мінез-құлық туралы әңгімелер жүргізіңіз. Олардың орналасуын, әсіресе түнде бақылаңыз. Есіңізде болсын - балаларыңыз кәмелетке толғанға дейін сіз жауаптысыз!