Кадастрлық құнды анықтау - жер учаскесiн немесе оның жалдау құқығын сату кезiнде қажеттi талап етiлетiн қызмет.

«Жылжымайтын мүліктің бірыңғай мемлекеттік кадастры» ақпараттық жүйесін енгізгеннен кейін және онымен байланысты цифрлық Жария кадастрлық картаны іске қосқаннан кейін жылжымайтын мүлікке байланысты бірқатар қызметтер онлайн режиміне көшті және нәтижені күту уақыты бірнеше күннен бірнеше минутқа дейін қысқарды.

Елді мекендер шегінде орналасқан жер учаскелері бойынша елді мекеннің белгіленген шекаралары және бағалау аймақтары болған кезде жүйе деректерді тексеріп, 16 минут ішінде жер учаскесінің кадастрлық (бағалау) құнын айқындау актісін қалыптастырады.

«Азаматтарға арналған үкімет» мемлекеттік корпорациясы жеке және заңды тұлғаларға қызмет көрсетеді. Жер учаскесінің кадастрлық құнын анықтауға өтінішті ХҚО  немесе eGov.kz порталы арқылы беруге болады.

Алайда, егер ақпараттық жүйеге учаске туралы деректер енгізілмесе, оның кадастрлық құнын есептеу мерзімі үш жұмыс күніне дейін ұзартылады.

Бағалау актісін алу үшін өтініш, жеке куәліктің көшірмесін, жер учаскесін таңдау актісінің және (немесе) орналастыру схемасының көшірмесін, ауыл шаруашылығы алқаптарының экспликациясын (ауыл шаруашылығы мақсатындағы жерлер үшін) және қызмет төлемі туралы түбіртекті ұсыну қажет.