Жалпы өндірілген өнім көлемі 18,2 миллиард теңгеге жетіп, бұл өткен жылдың сәйкес кезеңімен салыстырғанда 3,3 миллиард теңгеге артық. Бұл – 122,1% орындалу көрсеткіші деген сөз. Әсіресе ауыл шаруашылығы саласында өсім сақталып отыр. Мал шаруашылығы 100,4% орындалса, өсімдік шаруашылығы да тұрақты деңгейде – 100%.

Құрылыс секторы да ерекше белсенділік танытты. Аудандағы құрылыс көлемі 2,5 млрд теңгені құрап, 159%-ға орындалды. Бұл – өңірдің инфрақұрылымдық дамуындағы сенімді қадам. Тұрғын үй құрылысы да қарқын алуда: 3478 шаршы метр баспана пайдалануға берілді.

Инвестиция тарту мәселесі де оң шешімін тауып келеді. Негізгі капиталға тартылған инвестициялар көлемі 3,9 миллиард теңгені құрап, өткен жылмен салыстырғанда 135,1%-ға орындалды. Ал жеке сектор бойынша 6,0 миллиард теңгеге 19 жоба жүзеге асырылып, 100-ден астам адам жұмыспен қамтылды. Бұл ауданда кәсіпкерлік әлеуеттің артып келе жатқанын көрсетеді.

Әрине, бәрі мінсіз емес. Өнеркәсіп өндірісі бағытында біраз қиындықтар бар. 7,5 млрд теңгенің өнімі өндірілгенімен, нақты көлем индексі 86,4%-ды ғана құрады. Мұның себебі ретінде Доре қорытпасын өндіру көлемінің төмендеуін айтуға болады. Көкқия кен орнындағы күрделі геологиялық жағдайлар мен ашық әдіспен жүргізіліп жатқан тау-кен жұмыстары өнім сапасына әсер етуде.

Соған қарамастан, аудан бюджеті бойынша түсімдер 2,3 млрд теңгені құрап, жоспар 110,8%-ға орындалды. Бұл – қаржылық тұрақтылық пен тиімді салықтық саясаттың айғағы.

Қорыта айтқанда, аудан экономикасының даму қарқыны көңіл қуантады. Инфрақұрылымдық жобалар, инвестициялық бастамалар және ауыл шаруашылығы мен құрылыстағы жетістіктер аймақтың болашағы жарқын екенін көрсетіп отыр. Алдағы уақытта да бұл үрдіс сақталып, өңір әлеуметтік-экономикалық тұрғыда жаңа белестерге жетеді деп сенеміз.