Мемлекет басшысының тапсырмасы бойынша 2024 жылы басталған «Таза Қазақстан» республикалық экологиялық акциясы облыста белсенді жүзеге асырылуда. Акция аясында «Таза өлке», «Киелі мекен», «Жасыл аймақ», «Өнегелі ұрпақ» және «Мөлдір бұлақ» бастамалары ұйымдастырылды. Нәтижесінде 60 тарихи-мәдени ескерткіш, 143 саябақ пен сквер, 829 шақырым канал мен арық жүйесі, 137,5 мың аула және 4,8 мың шақырым көше тазартылды. 30 875 тонна қоқыс шығарылып, 60 мыңға жуық көшет отырғызылды. Бұл жұмыстарға 1 110 бірлік техника жұмылдырылды.

2025 жылдың 15 наурыз бен 20 сәуір аралығында «TazaLike» акциясы шеңберінде облыс әкімі бекіткен 15 іс-шара жоспары жүзеге асырылды. Оның ішінде 7 акция жасыл желек отырғызуға бағытталған. 15 наурызда Тараз қаласы мен аудандарда жаппай сенбілік өтіп, «Болашақты бірге отырғызамыз» акциясы аясында 381 мектептен 47,8 мың оқушы қатысып, 28,9 мың тал отырғызылды. Сонымен қатар, «Jambyl Cement» компаниясы 3,6 мың, «Тараз металлургиялық зауыты» 10 мың, «Qazaq Soda» компаниясы Сарысу ауданында 27 мың көшет отырғызуды жоспарлаған. «Жасыл белдеу» жоспары бойынша Тараз қаласы мен аудандарда 195 мың жасыл желек отырғызылады.

Қанатбек Қайшыбекұлының айтуынша, бұл бастамалар экологиялық мәдениетті қалыптастыруға және өңірдің жасыл аймақтарын кеңейтуге бағытталған. Тараздағы талдарды цифрландыру жұмыстары ағаштарды есепке алу және күтіп-ұстауды жеңілдетеді, бұл экологиялық тұрақтылықты қамтамасыз етеді. Мұндай шаралар облыстың табиғи ортасын сақтауға және болашақ ұрпаққа таза экология мұра етіп қалдыруға ықпал етеді.