Осы жылдың маусым айында Будапешт татамиінде өткен әлем чемпионаты қазақ спорт тарихында ерекше белес болып қалды. Дзюдо кілемінде талай мықтыны тізе бүктірген Абиба Әбужақынова финалға дейін сүрінбей жетіп, күміс жүлдені еншілеген еді. Бұл жетістік — жай ғана медаль емес, қазақ әйелдері арасынан әлем чемпионатының финалына тұңғыш шыққан тарихи сәт болды.

Жылдың соңына қарай Абибаға тағы да үлкен сынақ күтіп тұр. Ол Абу-Даби және Токио Гранд Слэм турнирлерінде бақ сынауы мүмкін. Бұл жарыстар — Париж Олимпиадасына дейінгі маңызды дайындық алаңы болмақ.

Осы салмақта ел намысын қорғап жүрген тағы бір спортшымыз, тәжірибелі Ғалия Тынбаева, қазіргі таңда әлемдік рейтингте 25-орында тұр. Ал 63 келіге дейінгі салмақта күресетін Есмігүл Қуюлова - 908 ұпаймен 49-сатыда. Әйелдер арасындағы аса ауыр салмақта ел намысын Назгүл Маратова қорғап жүр, оның көрсеткіші - 45-орын.

Ерлер құрамасында да жағдай назардан тыс емес. Олимпиада чемпионы Елдос Сметов қазіргі таңда 16-сатыда, ал оның командаласы, әлем чемпионатының жүлдегері Ғұсман Қырғызбаев — 14-орында. 81 келіге дейінгі салмақта өнер көрсететін Абылайхан Жұбаназар 13-сатыға жайғасқан. Ал -100 келі санатында Шархан Нұрлыхан 30-орында, аса ауыр салмақта ел үмітін арқалап жүрген Ерасыл Қажыбаев 21-орынға тұрақтаған.

Айта кетерлігі, биылғы Будапешттегі әлем чемпионатында Қазақстан ерлер құрамасы жүлдесіз қайтты. Дегенмен тәжірибелі балуан, Олимпиада жүлдегері Ғұсман Қырғызбаев жарысты жетінші орынмен аяқтап, келесі маусымға сенім ұялатты.

Будапешт татамиінде төселген жол - қазақ дзюдосының жаңа буынының өрлеу кезеңі екені анық. Абибаның табандылығы мен ерлер құрамасының күресі алдағы Олимпиада қарсаңында үміт отын қайта жаққандай.