Құрылыс қарқынының артуы алдымен тұрғын үймен қамту көрсеткішінен байқалды. Қордай ауылында 144 пәтерлі көпқабатты үй пайдалануға беріліп, ондаған отбасы баспаналы болды. Бұл – мемлекеттің тұрғын үй саясатының жергілікті деңгейде қалай тиімді іске асып жатқандығының нақты мысалы.

Сонымен қатар, әлеуметтік нысандар құрылысы да назардан тыс қалмаған. Үлкен Сұлутөр ауылында заманауи дәрігерлік амбулатория ашылып, ауыл тұрғындарына қолжетімді медициналық қызмет көрсету мүмкіндігі кеңейді. Бұдан бөлек, «Ауыл – ел бесігі» бағдарламасы аясында Үлкен Сұлутөр ауылында спорт кешені салынып жатыр. Аталған нысан ауыл жастарының спортпен тұрақты айналысуына үлкен мүмкіндік береді.

Сортөбе ауылында бір ауысымда 200 адамды қабылдай алатын емхана құрылысы жүріп жатыр. Бұл денсаулық сақтау инфрақұрылымының ауыл деңгейінде дамып жатқанын білдіреді. Сонымен қатар Қақпатас ауылында мәдениет үйінің құрылысы басталды. Жаңа мәдениет үйі жергілікті тұрғындардың мәдени өмірін жандандыруға сеп болады.

Аудандық әкімдік тарапынан іске асырылып жатқан жобалардың бірі – Гвардейск қалашығының инженерлік инфрақұрылымын жаңғырту. Бұл бағытта бір мезетте алты жоба қолға алынған. Атап айтқанда: жаңа қазандық салу, жылу желілерін ауыстыру, газбен жабдықтау жүйелерін жетілдіру, кәріз желілерін жаңарту және теміржол арқылы өтетін көпір салу. Бұл жобалар Гвардейск тұрғындарының тұрмыс сапасын арттырып қана қоймай, қала инфрақұрылымын жаңа деңгейге шығарады.

Сонымен қатар, аудан бойынша жалпы ұзындығы 24,7 шақырымды құрайтын 42 көшеге орташа жөндеу жұмыстары жүргізілуде. Бұл көлік қозғалысы мен жаяу жүргіншілерге қолайлы орта қалыптастыруға бағытталған нақты қадам.

Аудан басшылығы бұл бағыттағы жұмыстардың алдағы уақытта да жалғасатынын хабарлады. Әсіресе, шалғай ауылдарды әлеуметтік инфрақұрылыммен қамтамасыз ету басты міндет ретінде белгіленген.

Бір ғана жылдың ішінде жүзеге асырылып жатқан бұл жобалар Қордайдың даму бағытының жүйелі түрде іске асып жатқанын көрсетеді. Құрылыстың қарқынды жүруі, әлеуметтік нысандардың көбеюі және инфрақұрылымдық жобалардың кеңеюі – аудан халқының әл-ауқатын жақсартуға бағытталған нақты қадамдар.